تويت
"بسم الله الرحمان الرحيم "
سيارة اليوم موجودة برشا في الطريق ماهيش مولود جديد اما اكثر الشركات تخدم بيها و الناس العاديين زادا
المهم البيجو عملت الpick-up كرهبة رباعية الدفع و اقتحمت بيها السوق و طورتها كيما الشركات الكل الموجودة في العالم
الpick-up peugeot اتجينا اب موتو 2.5 لتر مع بوات فيتاس 5 و cylindrée 2498 cm2 و puissance 85 kw\115 ch a 3800 trs\mn
باهي الكرهبة هذي جابها مولاها في رومركاج ماتخدمش كيف جينا انشوفو نلقو الbattrie بالعا و ماتنجمش اتخدمها جملا جيبنا وحدا جيدة و ركبناها وافرحنا ماهيش حاجة كبيرة هه
قلنا برا انجربو انخدمو و الحمد لله خدمت اما الموتور كيما انقولو فيه حس كبير و قربع ماهو في الحالة العادية متاعو و صوتو متبدل ياسر
و اهنا فما المشكلة الي بعد ماتشاورنا و و اسالنا الناس الي اكيدعندها الخبرة اكثر منا قالونا اعملو تاست للles injecteurs و اكيد تو تلقو المشكل
كيما اتشوفو هذا الموتور باش نعملو الtest متع les injecteurs و باش اركبو الدبابز باش انشوفو فماش وحدين قاعدين ارجعو في المزوط خاطر العمليلة هذي اتنجم تعرف بيها الانجكتار المظروب ولا المريقل جيبنا الدبابز و ركبناهم في دريت الelretour متع المازوط
و النتيجة كيما باش اتشوفو في التصويرة
اهنا لاحظنا الي فما جوز من les injecteurs قاعدين ارجعو في برشا مازوط الي خلا الكرهبة تصرف برشا مازوط و اتلوث في الهواء و زيد مشكلة التكربيع
ولينا ناحيناهم و بدلناهم
و بعد تعدينا للreservoir خاطر انجم اكون المازوط امسخ ولا امخلط بالماء
هبطناه و اتشوفو في الحلة بدون تعليق ههه و المازوط امسخ زادا فرغناه و نظفناه و صبينا مازوط جديد و بدلنا le filtre de carburant
و اهنا واحد يعمل الdemarrage و لاخر ابنبي على الطرنبة متاع المازوط و عملنا test جديد بعد ماخدمت الكرهبة و كانت النتيجة كيما هكا
الحمد لله امورهم واضحة و ماعدش فما المشكل الي كان موجود و اهنا باش ازيدو نتاكدو عملنا diagnostic بالماكينة هذه
و كانت النتيجة باهية
و هنا انجم نطمنو الي الكرهبة رجعت لباس و باش ترجع للحربف امورها مريقلا
انا حسب ماتعلمت و الي ننصح بيه هو النوعية متع المازوط الي لازم يتصب باش مايخليش الناس تخسر برشا فلوس و هياماشي فيبالها تقتصد خاطر مش كيف مازوط 40 ومازوط 50 فما فرق و زيد على هذا لازم يتصب من بلايص معروفة و انظيفة
اضافة الي تبديل les filtres في وقتهم و كل شيء في النظام..
في الختام اشكركم على رحابت صدركم و على اهتمامكم و نعرف الي فما برشا حاجات ناقصة و ماهوش عمل ميثالي اما هكا اش نجمت نعمل ان شاء الله تحصل الافادة و شكرا
الملفات المرفقة