تويت
بسم الله و الصلاة و السلام على رسول الله
موضوعنا اليوم على مشكلة الرجة ولا الرعشة ولا الاهتزاز اللي يطلع في الكراهب اللي فيهم بوات من نوع DSG ولا DCT. المشكلة هذي صارت في كرهبة من نوع Chery Tiggo 7.
نوع المحرّك: أربع أسطوانات
ناقل الحركة: علبة تروس أوتوماتيكية مزدوجة القابض بـ 7 سرعات (DCT / 7-DCT)
نظام الدفع: دفع أمامي (2WD)
اول حالة كي تطلع دودان وتهبط منّو، ومن بعد كي باش تطلع تلقى الكرهبة ترجّ وترعش. وثاني حالة كي تاخو دورات.
توا باش نفسّرلكم كيفاش تصلّحو المشكلة هاذي بالبرمجة، أمّا قبل ما ندخلو في البرمجة لازم تتأكّد من أسباب أُخرى ممكن تعمل المشكلة:
- ة.أوّل حاجة تفقد سيبور البوات اللي شادينهم في هيكل الكرهبة.
- ثاني حاجة تفقد مستوى زيت البوات، يا إمّا من bouchant ولا من jauge الزيت من الفوق كان موجود.
- ثالث حاجة تفقد têtes des cardans (يمين ويسار).
وآخر حاجة تتأكّد من حالة البوجيات، وأنّو وقت تبديلهم ما فاتش، خاطر هما من أكثر الأسباب اللي تعمل المشكلة هاذي.
كان تأكّدت من الأمور هاذم الكل، ومازالت الرجة والرعشة موجودة، وخاصّة كان الكرهبة متاعك فيها ناقل حركة DSG ولا DCT، توا باش نوريك كيفاش تعالج المشكلة بالبرمجة.
تركّب فيشة diagnostic، وبعدها تحل كونتاكت من غير ما تخدم الكرهبة.
levier de vitesse لازم تكون على P، وتدخل لـ Service Function، وتلوج على Gearbox Learning وتنزل عليها. ينقلك لpage، تضغط OK وتستنى telechargement.
بعدها تختار نوع الكرهبة متاعك. هنا يقولك المفتاح على وضع ON، يعني كونتاكت محلول من غير تشغيل. تضغط OK، وبعدها يطلب منك تحدّد نوع السيارة.
نختار Tiggo Series، نلقاو أنواع برشة. الكرهبة هاذي نوعها Tiggo 7، قبل كانت تطلع باسمها واضح، أمّا بعد آخر تحديث ولات اسمها T1، نضغط عليها ونستنى telechargement.
هنا يقولك باش نعملو ترانسميسيون 6 سرعات، نضغط عليها. تطلعلك 6 اختيارات، تختار آخر اختيار اللي هو transmission .كي تضغط، تجيك رسالة Special Operation، تضغط عليها.
تطلع رسالة تقولك الكونتكات لازم يكون محلول، وfrein a main مشدود، و البوات على P. كي تبدا العملية، البوات باش تسمع منّو أصوات تكتيك غريبة، ما تخافش، هذا عادي برشة. البوات توا يعمل إعادة تموضع باش يعوّض التآكل ولا النقص اللي صار، ويشدّ وضعية جديدة.
تطلعلك رسالة ثانية، ركّز فيها مليح: يقولك طفّي الكونتاكت واستنّى 4 دقايق، وبعدها شغّل الكرهبة، ولا تفكّ كابلات البطارية وترجع تركّبهم ومن بعد تشغّل.
تطلعلك رسالة ثانية، ركّز فيها مليح:
يقولك طفّي الكونتاكت واستنّى 4 دقايق، وبعدها خدم الكرهبة، ولا نحي cosse batterie وترجع تركّبهم ومن بعد تخدم.
من المستحسن تعمل تعمل الزوز مع بعضهم: نستنّى 4 دقايق، وبعدها نحي cosse batteri ونرجّعو.
بعدها ما تخدامش الكرهبة ديراكت:
– حل الكونتاكت واستنّى 5 ثواني
– سكّر الكونتاكت واستنّى 5 ثواني
– حل الكونتاكت 5 ثواني
– سكّر 5 ثواني
– وأخيرًا حل الكونتاكت 5 ثواني
بعدها خدم الكرهبة. نخرج نجرّبها، ناخو دودنات ومن بعد دورات. المشكلة تختفي بنسبة لا تقلّ عن 80%.