Bmw e46 320d Diesel (m47)

[Haythem mhamdi]

• بسم الله . الصلاة والسلام على رسول الله
• السلام عليكم ????

• المشكل : (problème)
• جتنا للڤاراج كرهبة bmw e46 motorisation (m47) مولاها يشكي من مشكلة حيرتو . الكرهبة الصباح وهي باردة تخطف من أول ضربة وموتورها يدور لاباس عليه، أما بمجرد ما يمشي بيها وتسخن ويطفيها، كيف يجي يخطفها بعد درج ولا درجّين ما عادش تحب تخطف جملة. يقعد الديمارور يدور والموتور ما يجاوبش، ويلزمو يستناها تبرد حكاية ساعة كاملة باش ترجع تخطف عادي.
• 
• الحلول و الاصلاح : (solutions et réparation)

أول حاجة عملناها حطينا الـ Scanner و عدلنا عليه نوع السيارة باش يخرجلنا الديفو و فعلا هذا لي صار و طلعولنا les défauts هاذم:
P1220 : Réglage du calage d'injection - Variation de régulation.
P1222 : Commande de pompe d'injection - Erreur de débit
البان ما تحددش شنوا هوا اما لازمنا نعرفو وحدنا شنوا السبب لي يخلي pression de gasoil ناقصة ف السيارة..
و بما انو الصلاح عندو تجربة في ميكانيك سيارات الديزل عطانا المشكل اما قال لازم نتأكدو قبل .
هناباش نتأكدو من الشك متاعنا قبل ما نحلّو حتى boulon : استنينا الكرهبة لين سخنت وما حبتش تخطف، جبنا دبوزة ماء بارد وصبّيناها مباشرة فوق راس البومب (Tête de pompe) باش نبردوها فجئياً. جربنا نخطفو... خطفت الكرهبة في البلاصة! هنا التشخيص تأكد 100% اللي رأس البومب الهيدروليك تعب وم عادش يربّي الضغط كيف يسخن.

• التفسير العلمي للبان هذي :L’explication scientifique

1. ، أن رأس البومب فيه من داخل بيستون صغير يكبس المازوط بضغط قوي برشا باش يفتح ليزنجكتور. كيف تبدا الكرهبة باردة، القطع تكون متماسكة والضغط يطلع مريڤل. أما كيف تسخن البومب، الحديد يتمدد شوية بفعل السخونية والمازوط يولي خفيف (تطيح اللزوجة متاعو)، ف يولي يهرب لداخل وسط البومب وم عادش يوصل للضغط العالي اللي يخلّي الكرهبة تخطف. وكيف صبّينا الماء البارد، الحديد انكمش ورجع الضغط قوي للحظات فخطفت الكرهبة. حسب ما ريت قدام عيني و حسب ما قلي السيد مراد حمدي ميكانيكي ممتاز ب المغيرة الله يباركلو
2. باش نقطعو الشك فرد مرة حلينا الجعب الانجيتورات من فوق شنتاكدو لي هوما يخدمو لاباس و جربناهم ب الواحد ب الواحد باش نتاكدو انو الكلهم يبخو كيف كيف( ب العين المجردة) ..

• بعد ما تأكدنا من البان، تعدينا للخدمة الصحيحة. فكينا الجعب الحديدية متع المازوط ونحينا الفيسات اللي شادين رأس البومب القديم وخرجناه بالسياسة.
• بما إنو تغيير رأس البومب (Tête hydraulique) يستحق دقة عالية ووزنية صحيحة، هزينا الطرمبة للبومبيست (Pompiste).
• هو قام بتفكيك الرأس القديم، ونظف الـ Corps de pompe مليح، وركب الرأس الجديد المطابق بالـ Référence مع تغيير الجوانات الدخلانية. بعد التركيب، حط الطرمبة على ميزان الاختيار (Banc de test) باش يضبط كمية ضغط المازوط (Calibrage du débit) وزاوية تقديم الحقن (Avance d'injection) حسب معايير الدار (Bosch).
• بعد ما كمل البومبيست خدمتو ورجعهالنا مريغلة، رجعنا ركبنا الطرمبة في الموتور، كبسنا الجعب الحديد متع ليزنجكتور مليح... بعد التركيب، قعدنا ننزلوا على النبّالة (Poire d'amorçage) برشا مرات باش نخرجوا الهواء اللي دخل للدارة لين تعبّت بالمازوط الصافي وقساحت في اليد.
• (مع العلم زايدينها زيادة لقيناها ف السيارة موش م المصنع خارجة ب النبالة متاع المازوط هيا اصلها ايليكتريك يعني.. )
• بعد ما رجعنا كل شيء في بلاصتو، عطينا ضربة كونتاكت الأولى، خطفت الكرهبة تبارك الله وصوت الموتور ركح صافي. وباش نعملو التست الصحيح، خرجنا بيها جولة طويلة وعملنا بيها مسافة وسرعنا بيها لين سخنت بالباهي ووصلت لدرجة حرارتها العادية. رجعنا للڤاراج، سكتنا الموتور، واستنينا 5 دقائق (الوقت اللي كانت مستحيل تخطف فيه). ضربنا كونتاكت... خطفت الكرهبة ومن أول مرة من غير ما نمسو الاكسيراتور. عاودنا جربنا سكتنا وخطفنا برشا مرات والنتيجة طلعت ممتازة، م عادش نسحقو لدبوزة الماء، والضغط رجع قوي وثابت والحمد لله الكرهبة تصلحت..

[سامي بن خضرة]

هذه خدمتك ولا خدمة واحد دزيري ؟